"ସ" - ସଖି ନ ବସ ଗୋ ତୁ ଗୁମାନେ

(ରାଗ ମଙ୍ଗଳ ଗୁଜ୍ଜରୀ, ତାଳ ଆଦିତାଳ)

ସଖି ନ ବସ ଗୋ ତୁ ଗୁମାନେ । ଘୋଷା ।

ଶୁଣି ଶ୍ୟାମ ତୋର ବାଣୀ ପ୍ରାଣ କଣ୍ଠତଟେ ଆଣି

ରଖିଲା ପରିରେ ଦିଶେ ଅନୁମାନେ । ୧ ।

ଶରଦ ଚନ୍ଦ୍ରମା ମୁଖୀ କର ତୁ ଶ୍ୟାମକୁ ସୁଖୀ

ଅଧର ମଧୁର ସୁଧା ରସପାନେ । ୨ ।

ଶପତ କଲାଣି ବେଣୁ ଛୁଇଁ ତ ନୀରଦ ତନୁ

ମନେ ହେଲେ ନ ରସିବି ବୋଲି ଆନେ । ୩ ।

ସହି ରେ ତୁ ଦୟାବତୀ ବୋଲାଇ ନିଷ୍ଠୁର ଅତି

ହେବାର ଆଜ ଗୋ ଘେନ ତୋତେ ଯେ ନ ମାନେ । ୪ ।

ସହରଷେ ରାଜଇନ୍ଦୁ ଭଣଇ ସେ ପ୍ରାଣବନ୍ଧୁ

କର କରୁଣାକୁ ଦିବ୍ୟ ଅବଧାନେ । ୫ ।