କେଡ଼େ ଛନ୍ଦ ଜାଣେ ଲୋ ସହି

ଉଇକିପାଠାଗାର‌ରୁ
(କେତେ ଛନ୍ଦ ଜାଣେ ଲୋ ସହିରୁ ଲେଉଟି ଆସିଛି)
ଲେଖକ/କବି: ବନମାଳୀ ଦାସ
କେଡ଼େ ଛନ୍ଦ ଜାଣେ ଲୋ ସହି

କେଡ଼େ ଛନ୍ଦ ଜାଣେ ଲୋ ସହି
ରାଗ ମିଶ୍ରମୁଖାରୀ, ତାଳ ଖେମଟା

କେଡ଼େ ଛନ୍ଦ ଜାଣେ ଲୋ ସହି
ନନ୍ଦରାଜାର ଟିକି ପିଲାଟି
ଟିକି ପିଲା ବୋଲି ଯାହାକୁ ବୋଲନ୍ତି
ଚିରି ପକାଇଲା ବକାର ପାଟି । ଘୋଷା ।

ଜନମକାଳେ ଏନ୍ତୁଡ଼ିଶାଳେ
କୁଆଁ କୁଆଁ ହୋଇ ରାବିଲା ଛଳେ
ରହିଣ କୋଳରେ କ୍ଷୀର ସହିତରେ
ପୂତନା ଅସୁରୀ ପ୍ରାଣ ନେଲାଟି । ୧ ।

ନ କରିଣ ଦକା ନାଶିଲା ଆଶଙ୍କା
ଚନ୍ଦନପାଟିଆ ଚିତ୍ତ ଚମକା
ଶକଟା ଧେନୁକା ବକା ସର୍ପ ଦଳି
ବନର ଅନଳ ଗିଳିଦେଲାଟି । ୨ ।

ଇନ୍ଦ୍ର ବିବାଦେ ନିର୍ଘାତ ନାଦେ
ଶିଳା ବରଷିଲା ଅତି ପ୍ରମାଦେ
ଦେଖିଛ ତ ହାଦେ ବିନା ଅବସାଦେ
ମନ୍ଦର ଗିରିକି ଟେକି ଥିଲାଟି । ୩ ।

ସ୍ନାହାନ କାଳେ ଯମୁନା ଜଳେ
ନନ୍ଦ ବୁଡ଼ିଗଲା ବୋଲି ଅଥଳେ
କଉତୁକ କରି ତାହାଙ୍କୁ ଉଦ୍ଧରି
ଗୋପରେ ପତାକା ଉଡ଼ାଇଲାଟି । ୪ ।

ସେଦିନ କଂସ ହୋଇଣ ରୋଷ
ଲକ୍ଷେ ପଦ୍ମ ପାଇଁ ଦେଲା ଆଦେଶ
ପଦ୍ମତୋଳା ରସ କରିଣ ପ୍ରକାଶ
ବଳେ ଛଳେ କାଳୀ ଦଳିଦେଲାଟି । ୫ ।

ବିସ୍ତାରି ପାଟି ଖାଇଲା ମାଟି
ମାଆ ଯଶୋବନ୍ତୀ ଛାଟରେ ପିଟି
ଆକଟନ୍ତେ ଥରେ ତା ପେଟ ଭିତରେ
ଅଶେଷ ବ୍ରହାଣ୍ଡ ଦେଖାଇଲାଟି । ୬ ।

କେ ଜାଣେ ଲୋ ମା ତାହାର ମହିମା
ବତ୍ସା ହରିନେଲା ସେ ବେଦବ୍ରହ୍ମା ।
କହେ ବନମାଳୀ ତାକୁ ପୁଣି ଛଳି
ଲକ୍ଷେ ଧେନୁବତ୍ସା ଜାତ କଲାଟି । ୭ ।