ପୃଷ୍ଠା:Aama Gangadhara.pdf/୧୦୪

ଉଇକିପାଠାଗାର ରୁ
Jump to navigation Jump to search
ଏହି ପୃଷ୍ଠାଟି ବୈଧ ହୋଇସାରିଛି


ବ୍ରହ୍ମା ରୁଦ୍ର ପୁର- ନ୍ଦରାଦି ବିବୁଧେ
ଭକ୍ତିଭରେ ସାଦରେ
ଆଜ୍ଞାଧୀନ କୃତା- ଞ୍ଜଳି ହୋଇ ସଦା
ସେବନ୍ତି ଯା ପାଦରେ ।

ନିତ୍ୟେ ବିଷ୍ଣୁପଦେ ଗମନ୍ତି ନିୟମେ
ଚନ୍ଦ୍ରାର୍କ ଆଜ୍ଞାବଳେ
ତୁମ୍ଭ ଶ୍ରୀଚରଣା- ମ୍ୱୁଜେ ରହୁ ସଦା
ଚିତ୍ତାଳି ମୋ ନିଶ୍ଚଳେ ।

ବ୍ରହ୍ମାଣ୍ଡୋଦ୍ଭବ ପାଳନାନ୍ତକର ହେ
ଆପେ ତ୍ରିମୂର୍ତ୍ତିି ଧରି
ଦୁଃଖି-ଦୁଃଖ ତିମିର- ହାରକ ଦୟା
ରଶ୍ମି-ପ୍ରଦାୟୀ ହରି ।

ପଙ୍ଗୁ ଲଙ୍ଘଇ ଶିଖରୀ ଅବହେଳେ
ତୁମ୍ଭେ କରୁଣା କଲେ,
ତୁମ୍ଭ ଶ୍ରୀଚରଣା- ମ୍ୱୁଜେ ରହୁ ସଦା
ଚିତ୍ତାଳି ମୋ ନିଶ୍ଚଳେ ।

ଭାରତୀ-ରୋଦନ

ଉତ୍କଳ ଭାରତୀ ରୋଦନ କରୁଛି
କାତରେ ସମ୍ୱଲପୁରେ,
ସେ ବିକଳ ଧ୍ୱନି କର୍ଣ୍ଣରେ ପଡ଼ିଲେ
ନୟନେ ଲୋତକ ପୂରେ ।

ବୋଲଇ ଦୁଃଖିନୀ କେତେ କେତେ କଷ୍ଟ-
ସହି ମୋ କୋଳରେ ଧରି,
କୁମାରଙ୍କୁ ମୋର ପାଳନ କରୁଛି
ପ୍ରାଣାଧିକ ସ୍ନେହ କରି ।