ପୃଷ୍ଠା:Aama Gangadhara.pdf/୫୯

ଉଇକିପାଠାଗାର‌ରୁ
ଏହି ପୃଷ୍ଠାଟି ବୈଧ ହୋଇସାରିଛି

ତହୁଁ କିଛି ଦୂରେ 'ହୁମା' ମହେଶ୍ୱର
ଚାହିଁ ତା' ଚାରୁ ମୂରତି,
ସ୍ନେହେ ଡାକିବାରୁ ନିକଟକୁ ତାଙ୍କ
ଯିବାକୁ ଦେଇ ସମ୍ମତି ।

ମହେଶ-ଅଙ୍ଗୁଳି ରେଖାଙ୍କିତ ପଥେ
ଉତ୍ତରକୁ ଏକ ଧାର,
ଗଲା ଘୋର ଶିଳା ସଙ୍କୁଳ ଦୁର୍ଗମ
ବନପଥ ହୋଇ ପାର ।

ତୋଷି ତାଙ୍କୁ ପୁଣି ପୂର୍ବ ଧାରେ ମିଶି
ଗମନ କରି ସତ୍ୱରେ,
ଆସି ତୋ' ପାଶରେ ମିଳନ୍ତେ ସସ୍ନେହେ
ବସାଇଅଛୁ ଅଙ୍କରେ ।

ପରସ୍ପର ଶୋଭା- ବର୍ଦ୍ଧନ କାରଣେ
ହୋଇଅଛି ସମାହାର,
ସୁନ୍ଦର ପ୍ରତିମା ଗଳେ ଦେଲା ବିଧି
ଇନ୍ଦ୍ରନୀଳମଣି ହାର ।

ଶରସୁନ୍ଦରୀକି ଶୋଭା କରନ୍ତି ଯେ
କୌମୁଦୀ କୁସୁମମାଳେ,
ମଞ୍ଜୁ ରତ୍ନଟିଏ ଦେଇଅଛନ୍ତି ଯେ
ଉଷା ଦିବ୍ୟଯୋଷା ଭାଳେ ।

ଯୁବତୀ ବଦନେ ଦେଇଅଛନ୍ତି ଯେ
ଜଗତମୋହିନୀ କାନ୍ତି,
ଯେହୁ ଦେଇଛନ୍ତି କୁସୁମେ ସୌରଭ
ସାଧୁ ହୃଦୟରେ ଶାନ୍ତି ।

ଆମ ଗଙ୍ଗାଧର.୫୯