ଏହି ପୃଷ୍ଠାଟି ବୈଧ ହୋଇସାରିଛି
ଯହିଁ ପ୍ରଭାବତୀ ଦ୍ରୌପଦୀ-ମୂରତି
କୁସୁମ-ହସିତ ଲତା,
ପ୍ରତିବିମ୍ବ ପଡ଼ି ନୟନରେ ତାର
ଦେଉଅଛି ଶୀତଳତା ।
ସେହି ଶୀତଳତା କରୁଅଛି କିନ୍ତୁ
ବୃଦ୍ଧି ତା ହୃଦୟ-ଦାହ,
ସ୍ୱଭାବ-ଶୀତଳ ଜଳପାତେ ଯଥା
ତପତ ତୈଳ କଟାହ ।
ଦାସୀକି ପଚାରି ଅବଗତ ବୀର
ହୋଇଥିଲା ପୂର୍ବ ଯାମେ,
ରମଣୀରତନ ରାଜଗୃହ ମଧ୍ୟେ
ରହେ ସଇରିନ୍ଧ୍ରୀ ନାମେ ।
କେ ତାର ଜନକ, ଅଛି କି ନା ପତି
କାହିଁ ବା ପୂର୍ବ ନିବାସ,
କେଉଁ ଉଦ୍ଦେଶ୍ୟରେ ଏ ପୁରେ ଆଗତ
ତାହା ନୁହେ ସୁପ୍ରକାଶ ।
ବାସ ଭୂଷଣରୁ ପ୍ରକାଶିତ ହୁଏ
ସଧବା ଲକ୍ଷଣଯାକ,
ଉଚ୍ଚକୁଳ ବଧୂ- ପରିଚାୟକ ତା'
ଆଚରଣ ଆଉ ବାକ୍ୟ ।
ସୈରିନ୍ଧ୍ରୀ ହେଲେ ହେଁରାଜପୁର ମଧ୍ୟେ
ଦେଖିଲେ ତାହାର ଠାଣି
ବୋଧହୁଏ ତାର ଆଗେ କିଛି ନୁହେଁ
ଅମର ନଗରରାଣୀ ।
ଆମ ଗଙ୍ଗାଧର.୬୭