ଏହି ପୃଷ୍ଠାଟି ବୈଧ ହୋଇସାରିଛି
ଧର୍ମରାଜଙ୍କର ମତିକି ସେ ନିଜ
ବିବେକରେ ପାରେ ଜିଣି,
ରାଜପୁର ନାରୀ ମଣ୍ଡଳକୁ ସ୍ନେହ
ମୂଲ୍ୟେ ନେଇଅଛି କିଣି ।
ବିରାଟ ମହିଷୀ ହୋଇଛନ୍ତି ତାର
ପବିତ୍ର ଚରିତ୍ରେ ବଶ,
ପାଇଛନ୍ତି ପରା ବିଶ୍ୱଲୋଭନୀୟ
ବିଶୁଦ୍ଧ ସୁବର୍ଣ୍ଣ କସ ।
ନାଗରୀର କଥା ମାନ ହେଲା ତା'ର
ହୃଦୟପଟେ ଲିଖିତ,
ପଢ଼ି ପଢ଼ି ତାହା ହେଲା ସ୍ୱଭାବତଃ
ପ୍ରେମ-ଧର୍ମରେ ଦୀକ୍ଷିତ ।
ଯୁବତୀରତନ ଲାଭ କଥା ତାର
ପ୍ରାଣେ ହେଲା ମୂଳମନ୍ତ୍ର,
ମନୋରାଜ୍ୟେ କ୍ରମେ ଚଳିଲା ଶାସନ-
ପ୍ରଣାଳୀ ମଦନ ତନ୍ତ୍ର ।
ନ୍ୟାୟଦେବଙ୍କର ବ୍ୟବସ୍ଥା ସକଳ
ଅଚିରେ ହେଲା ରହିତ,
ଚଳିଲା ମନ୍ତ୍ରଣା ଅବିରତ ମଦ-
ମୋହ ମନ୍ତ୍ରୀଙ୍କ ସହିତ ।
ସ୍ଥିର କଲା ବୀର ବିବିଧ ଉପାୟେ
ନାରୀକି କରିବି ବଶ,
ମୋ ବୀର-ଗୌରବେ ଅତୁଳ ବିଭବେ
ତା' ପ୍ରୀତି ହେବ ଅବଶ୍ୟ ।
୬୮ . ଆମ ଗଙ୍ଗାଧର