ଏହି ପୃଷ୍ଠାଟି ବୈଧ ହୋଇସାରିଛି
ଯେଉଁ ରାଜା ଯେଉଁ ଦୋଷେ ଲିପ୍ତ ଥାଇ
ପରକୁ ଦଣ୍ଡେ ସେ ଦୋଷେ,
ଧର୍ମରାଜ ତାକୁ ତହୁଁ ଶତ ଗୁଣ
ଦଣ୍ଡ ଦେଇଥାନ୍ତି ରୋଷେ ।
କେଉଁ ଗୁଣ ପାଇଁ ମୋ ପ୍ରତି ରହିବ
ରାଜଲକ୍ଷ୍ମୀଙ୍କର ପ୍ରୀତି,
ମିଥ୍ୟା ପ୍ରବଞ୍ଚନା ନିରୀହେ ଲାଞ୍ଛନା
ହେଲାଠାରେ ରାଜନୀତି ।
କେଉଁ ଭୂତ ଏଡେ଼ ଭ୍ରମ ଜନ୍ମାଇଲା
ମସ୍ତକରେ ମୋର ବସି,
ଭୁଜ-ବଳୟକୁ ଭୁଜଙ୍ଗ ମଣିଲି,
ଲକ୍ଷ୍ମୀଙ୍କୁ କଲି ରାକ୍ଷସୀ ।
ଆଉ ଲଭିବି କି ପ୍ରିୟ ବଲ୍ଲଭୀ କି
ଦୁଃଖୀ ହେଲି ଦେଇ ଦୁଃଖ,
ବନେ ତପୋବନେ ଲୋଡ଼ି ବା ଲଭନ୍ତି
କେହ୍ନେ ଦେଖାଇବି ମୁଖ !
ସଖୀ-କଷ୍ଟ ଶୁଣି କିସ କହୁଥିବେ
ଅନସୂୟା, ପ୍ରିୟମ୍ବଦା,
ବଳ ଦେଖାଇଲି ଶିରୀଷ-କୁସୁମେ
ପ୍ରହାରି ଦାରୁଣ ଗଦା ।
ତାଙ୍କ ଅମାୟିକ ହୃଦ-ଉଦ୍ୟାନେ ମୁଁ
ଲଗାଇଲି ମାୟାନଳ,
ତାଙ୍କୁ ଦହି ନିଜେ ଦଗ୍ଧ ହେଉଛି
ଯନ୍ତ୍ରଣା ବଡ଼ ପ୍ରବଳ ।
ଆମ ଗଙ୍ଗାଧର.୯୫