ପୃଷ୍ଠା:Aama Odia Byakarana.pdf/୩୭

ଉଇକିପାଠାଗାର‌ରୁ
ଏହି ପୃଷ୍ଠାଟି ବୈଧ ହୋଇସାରିଛି
କେଉଁଠାରେ, କେତେବେଳେ ?

(କ) ନରହରି ବାବୁ ଗାଆଁରେ ରହନ୍ତି ।
(ଖ) ରାତିରେ ନକ୍ଷତ୍ରସବୁ ଦେଖାଯାଆନ୍ତି ।

ପ୍ରଥମ ବାକ୍ୟରେ ‘ରହନ୍ତି’ କ୍ରିୟାପଦ ଏବଂ ଦ୍ୱିତୀୟ ବାକ୍ୟରେ ‘ଦେଖାଯାଆନ୍ତି’ କ୍ରିୟାପଦ । ଏହି କ୍ରିୟାପଦ ଦୁଇଟିର ମୂଳରେ ଆମେ 'କେଉଁଠାରେ' ବା 'କେତେବେଳେ' ଲଗାଇ ପ୍ରଶ୍ନ କରିବା ଏବଂ ଉତ୍ତରରେ କେଉଁ କେଉଁ ପଦ ମିଳୁଛି, ଦେଖିବା ।

ପ୍ରଶ୍ନ ଉତ୍ତର
କେଉଁଠାରେ ରହନ୍ତି ? ଗାଆଁରେ
କେତେବେଳେ ଦେଖାଯାଆନ୍ତି ? ରାତିରେ

କ୍ରିୟାପଦର ମୂଳରେ କେଉଁଠାରେ ବା କେତେବେଳେ ଲଗାଇ ପ୍ରଶ୍ନ କଲେ ଉତ୍ତରରେ ଯେଉଁ ପଦ ମିଳେ, ତାହାକୁ ଅଧିକରଣ କାରକ କହନ୍ତି ।

ଉପର ବାକ୍ୟଦୁଇଟିରେ ‘ଗାଆଁରେ’ ଏବଂ ‘ରାତିରେ’ ଦୁଇଟି ଅଧିକରଣ କାରକ ।

ତୁମେ ନିମ୍ନଲିଖିତ ବାକ୍ୟଗୁଡ଼ିକରେ ଅଧିକରଣ କାରକ ଚିହ୍ନାଇଦିଅ ।

(କ) ବସନ୍ତ ଋତୁରେ ଦକ୍ଷିଣ ଦିଗରୁ ପବନ ବହେ ।

(ଖ) ସମୁଦ୍ରରେ ମଧ୍ୟ ଅସଂଖ୍ୟ ପ୍ରକାର ପ୍ରାଣୀ ଅଛନ୍ତି ।

ଆମ ଓଡ଼ିଆ ବ୍ୟାକରଣ ■ ୩୯