ଏହି ପୃଷ୍ଠାଟି ବୈଧ ହୋଇସାରିଛି
ବନ ପୋଡ଼ି କାଳେ ଘୋର ଦାବାନଳେ,
ଉଦ୍ଧରି ରଖିଲ ବ୍ରଜବାଳେ ।
ଭଣେ ଉପଇନ୍ଦ୍ର କବି କୁଳ ଚନ୍ଦ୍ର,
ଶରଣ ମୁଁ ତୁମ୍ଭ ପାଦ ତଳେ ।।୫।।
ଉପେନ୍ଦ୍ରଭଞ୍ଜ
-୫ -
ଥକାମନ ଚାଲ ଯିବା, ଚକାନୟନ ଦେଖିବା ।
ଶଙ୍ଖନାଭି ମଣ୍ଡଳରେ, ବେନିନେତ୍ର ପଖାଳିବା ॥ ପଦ ॥
ବାଟରେ ବାଟ ମଙ୍ଗଳା, ଦେଖିବା ଅଠର ନଳା,
ପାଞ୍ଚ ମନ ଏକ ମେଳା ନରେନ୍ଦ୍ରେ ସ୍ନାନ କରିବା ॥ ୧ ॥
ପହଞ୍ଚିବା ବଡ ଦାଣ୍ଡେ, ସେ ରେଣୁ ପାଇବା ତୁଣ୍ଡେ,
ଛତା ତଳେ ରହି ଦଣ୍ଡେ, ସାଧୁଙ୍କ ସେବା କରିବା ॥ ୨ ॥
ସିଂହଦ୍ୱାରେ ଭିଡାଭିଡି, ବାଜୁଅଛି ବେତବାଡି,
ଠେଲିଦେଇ ଯିବା ମାଡି ଧକ୍କା ବାଜିଲେ ସହିବା ॥ ୩ ॥
ବାଇଶି ପାବ ଚ୍ଛବିକା, କୈବଲ୍ୟ ହେଉଛି ଚଖା,
ହାଣ୍ଡିକ ପଡ଼େ ସଉକା, ମନ ରଙ୍କା ଛଡାଇବା ॥ ୪ ॥
ଗରୁଡ ପଛରେ ଦେଖ, ଦିଶୁଛି କଲା ଶ୍ରୀମୁଖ,
କହଇ ସାରିଆ ଭିଖ , ବଳରାମଙ୍କୁ କହିବା ॥ ୫ ॥
-ସାରିଆ-
-୬-
