୨୦୦୯ ମସିହା ସାଧାରଣ ନିର୍ବାଚନରେ ବିଜୁ ଜନତା ଦଳର ଦଳୀୟ ପ୍ରାର୍ଥୀ ହୋଇଥିବା ଶ୍ରୀ ରଣେନ୍ଦ୍ର ପ୍ରତାପ ସ୍ୱାଇଁ (ରାଜା ସ୍ୱାଇଁ)ଙ୍କର ନାମାଙ୍କନ ପତ୍ରରେ ମୂଳ ଦଳୀୟ ଟିକେଟ ଦାଖଲ ହୋଇ ନଥିବା ଦର୍ଶାଯାଇ ତାଙ୍କର ପ୍ରାର୍ଥୀପତ୍ରକୁ ନାକଚ କରିଦିଆଯାଇଥିଲା । ସେ ସ୍ୱାଧୀନ ପ୍ରାର୍ଥୀ ଶ୍ରୀ ରମେଶ ରାଉତଙ୍କୁ ସମର୍ଥନ କରି ଜିତାଇଥିଲେ । ସେମାନଙ୍କ ମଧ୍ୟରେ ବୁଝାମଣା ହୋଇଥିଲା ଯେ ନିର୍ବାଚନରେ ବିଜୟ ପରେ ଶ୍ରୀ ରାଉତ ଇସ୍ତଫା ଦେଇ ଶ୍ରୀ ରଣେନ୍ଦ୍ରଙ୍କୁ ବାଟ ଛାଡ଼ିଦେବେ । ଏହି କଥାରେ ଶ୍ରୀ ରାଉତ ପ୍ରତିଶ୍ରୁତିବଦ୍ଧ ହୋଇଥିଲେ । କିନ୍ତୁ ଜିତିବା ପରେ ସେ ତାଙ୍କର ପ୍ରତିଶ୍ରୁତି ପାଳନ କଲେ ନାହିଁ । ରଣେନ୍ଦ୍ର ପ୍ରତାପ ସ୍ୱାଇଁ ଆଇନର ଆଶ୍ରୟ ନେଇ ସୁପ୍ରିମ୍ କୋର୍ଟ ଯାଏ ଯାଇ ବିଜୟୀ ହେଲେ । ଫଳରେ ରମେଶ ରାଉତଙ୍କ ସଭ୍ୟପଦ ରଦ୍ଦ ହେଲା ଏବଂ ସେ ଇସ୍ତଫା ଦେବାକୁ ବାଧ୍ୟ ହେଲେ । ଆଠଗଡ଼ ବିଧାନସଭା(୦୮୯- ସାଧାରଣ) ଆସନଟି ଖାଲି ପଡ଼ିଲା । ଏହି ଆସନ ପାଇଁ ୧୮-୩-୨୦୧୨ ତାରିଖରେ ଉପନିର୍ବାଚନ ଅନୁଷ୍ଠିତ ହେଲା । ପ୍ରାୟ ଶତକଡ଼ା ୭୦ ଭାଗ ଭୋଟର ମତଦାନ କଲେ ।
ଏହି ଉପନିର୍ବାଚନରେ ବିଜୁ ଜନତା ଦଳର ପ୍ରାର୍ଥୀ ଶ୍ରୀ ରଣେନ୍ଦ୍ର ପ୍ରତାପ ସ୍ୱାଇଁ ୮୭,୬୦୪ ଭୋଟ ପାଇ ବିଜୟୀ ହେଲେ । ତାଙ୍କର ନିକଟତମ ପ୍ରତିଦ୍ୱନ୍ଦ୍ୱୀ ଭାରତୀୟ ଜାତୀୟ କଂଗ୍ରେସର ପ୍ରାର୍ଥୀ ଶ୍ରୀ ସୁରେଶ ଚନ୍ଦ୍ର ମହାପାତ୍ର ୪୦,୨୧୪ ଭୋଟ ପାଇଥିବା ସ୍ଥଳେ ଭାରତୀୟ ଜନତା ପାର୍ଟିର ପ୍ରାର୍ଥୀ ଶ୍ରୀ ବିକ୍ରମ ଦାଶ ମାତ୍ର ୨,୪୫୨ ଭୋଟ ପାଇ ନିଜର ଅମାନତ ହରାଇଲେ ।
ମୁଖ୍ୟମନ୍ତ୍ରୀଙ୍କ ଲଣ୍ଡନ ଗସ୍ତ :
୨୦୧୨ ମସିହା ମଇ ମାସ ତୃତୀୟ ସପ୍ତାହରେ ମୁଖ୍ୟମନ୍ତ୍ରୀ ନବୀନ ପଟ୍ଟନାୟକ ସରକାରୀ ଗସ୍ତରେ ଲଣ୍ଡନ ଯାତ୍ରା କଲେ । ଓଡ଼ିଶାର ବିକାଶ ସଂପର୍କରେ ବିଭିନ୍ନ ଅନୁଷ୍ଠାନ ସହ ଲଣ୍ଡନରେ ଆଲୋଚନା କରିବା ତାଙ୍କର ଏହି ଗସ୍ତକ୍ରମର ଉଦ୍ଦେଶ୍ୟ ଥିଲା । ବିଶେଷ କରି ଡି.ଏଫ୍.ଆଇ.ଡି.ର ବରିଷ୍ଠ କର୍ମକର୍ତ୍ତାଙ୍କୁ ସେ ଭେଟିବାର କାର୍ଯ୍ୟକ୍ରମ ଥିଲା । ଏହି ଅବସରରେ ୨୪-୫-୨୦୧୨ ତାରିଖ ସୋମବାର ଦିନ ଲଣ୍ଡନର ସସେକ୍ସ ବିଶ୍ୱ ବିଦ୍ୟାଳୟଠାରେ ଇନ୍ଷ୍ଟିଚ୍ୟୁଟ୍ ଅଫ୍ ଡେଭଲପ୍ମେଣ୍ଟ ଷ୍ଟଡିଜ୍ (ଆଇ.ଡି.ଏସ୍.)ଦ୍ୱାରା ଆୟୋଜିତ ଏକ ଆଲୋଚନା ଚକ୍ରରେ ରାଜ୍ୟର ବିକାଶ ସଂପର୍କରେ ସେ ଭାଷଣ ଦେବାର କାର୍ଯ୍ୟକ୍ରମ ଥିଲା । ହେଲେ କେତେକ ମାନବାଧିକାର ସଂଗଠନ ତରଫରୁ ବିଶ୍ୱବିଦ୍ୟାଳୟ ସମ୍ମୁଖରେ ବିକ୍ଷୋଭ କରାଯିବାର ଖବରପାଇ ମୁଖ୍ୟମନ୍ତ୍ରୀ ସେହି ଆଲୋଚନାଚକ୍ରରେ ଯୋଗଦାନକୁ ବାତିଲ୍ କରିଦେଇଥିଲେ । ଏହି ଆଲୋଚନାଚକ୍ରର ବିଷୟବସ୍ତୁ ଥିଲା 'ଓଡ଼ିଶାରେ ସଂସ୍କାର ଓ ସଫଳତା' (Reforms and Achivements of Odisha) । ଏହି ଆଲୋଚନାଚକ୍ରଟି ଆଇ.ଡି.ଏସ୍. କର୍ମଚାରୀ, ସଦସ୍ୟ, ଛାତ୍ର ତଥା ସର୍ବସାଧାରଣଙ୍କପାଇଁ ଉଦ୍ଦିଷ୍ଟ ଥିଲା । ମାତ୍ର ମୁଖ୍ୟମନ୍ତ୍ରୀ ନିଜର କାର୍ଯ୍ୟକ୍ରମ ବଦଳାଇ ଦେବାରୁ ଏହି ଆଲୋଚନାଚକ୍ରକୁ ବାତିଲ୍ କରିଦିଆଯାଇଥିଲା । ତାଙ୍କର ଏହି କାର୍ଯ୍ୟକ୍ରମ ବାତିଲ୍ ସଂପର୍କରେ କୌଣସି ନିର୍ଦ୍ଦିଷ୍ଟ କାରଣ ଦର୍ଶାଯାଇ ନଥିଲା । ମାତ୍ର ଲଣ୍ଡନ୩୨୪ . ଓଡ଼ିଶା ରାଜନୀତିର ଇତିହାସ