ପୃଷ୍ଠା:Pratham Purush.pdf/୨୬

ଉଇକିପାଠାଗାର‌ରୁ
ଏହି ପୃଷ୍ଠାଟି ବୈଧ ହୋଇସାରିଛି

 ଦେଖ ଆଜି ତମ ପାଇଁ
 କିପରି ଏ ସକାଳ ଜଳିଲା
 ଆକାଶରେ ପାଦଚିହ୍ନ ଲିଭିଗଲା
 ଅବସନ୍ନ ରାତି ଶୋଇଗଲା
 ଅନନ୍ତ ଶୂନ୍ୟକୁ ଦେଖ ଚାଲିଗଲେ
 ଯେତେ ସବୁ ଛାଇ
 ପଥରର ଅହଲ୍ୟା ବି
 ବନ୍ଦ ହେଲା ନିଜ ଜଡ଼ତାରେ
 ରାଜପୁତ୍ର ଚାଲିଗଲା
 ଅତିପ୍ରିୟ ବନବାସ ପାଇଁ

 ସମୟର ଚୋରା ବାଲି ଉପରେ
 ମୋ ସ୍ମୃତି କେଉଁପରି
 ସତର୍କ ପାଦରେ ଦେଖ ଖୋଜିବୁଲେ ଆଜି
 ହଜି ଯାଇଥିବା କେତେ ଛୋଟ ଛୋଟ
 ମୁହୂର୍ତ୍ତର ଭଙ୍ଗା ଖେଳନା ଓ
 ଅନ୍ତରଙ୍ଗ ରାତିର ଶାମୁକା
 ତମକୁ ମୁଁ ସବୁ ଦେଇଯିବି
 ଯଦି ଖାଲି ଖୋଜିପାଏ
 ଗୋଟିଏ ସଫଳ ପ୍ରେମ: ସମସ୍ତ ଜୀବନ

୨୬ । ପ୍ରଥମ ପୁରୁଷ