ଅଣାକାର ଅଣରୂପେ ପ୍ରକାଶ

ଉଇକିପାଠାଗାର ରୁ
Jump to navigation Jump to search
ଅଣାକାର ଅଣରୂପେ ପ୍ରକାଶ
ଲେଖକ/କବି: ଭୀମ ଭୋଇ

ଅଣାକାର ଅଣରୂପେ ପ୍ରକାଶ ।
କିଛି ନ ଦିଶନ୍ତି ଶୂନ୍ୟ ଆକାଶ ।ଘୋଷା।

ବର୍ଣ୍ଣଭେଦ ନାହିଁ କି ବର୍ଣ୍ଣ ବର୍ଣ୍ଣିବି,
ଅବର୍ଣ୍ଣ ସେ ପୁରୁଷ।୧।

ପାଦ ପାଣି ନାହିଁ କି ସେବା କରିବି,
ଭାବେ ହୁଅନ୍ତି ଦୃଶ୍ୟ ।୨।

କଟି ନାହିଁ ଆଡ଼ବନ୍ଧ କଉପୁନୀ
କାହିଁ ପିନ୍ଧିବେ କିସ ।୩।

ନାହିଁ କରପଖା ହୃଦୟ ମଣ୍ଡଳ,
ନାହିଁ ଉର ସନ୍ଦେଶ ।୪।

କାହିଁ ନ ରୁହନ୍ତି ଛଡ଼ାଇ ହୁଅନ୍ତି,
ନ କରନ୍ତି ବିଶ୍ୱାସ ।୫।

ଭଣେ ଭୀମହୀନ ପାମର ଅଜ୍ଞାନ,
ଗୁରୁ ପୟରେ ଆଶ ।୬।