ଦୁଃଖ ଜଣାଇବି କେତେ
ଦୁଃଖ ଜଣାଇବି କେତେ
ଅନ୍ତର୍ଗତରେ କାମନା ଅଛି ମୋର ଯେତେ ।ଘୋଷା।
ରବି ତଳେ ଯେବେ ଜାତ କରିଅଛ ମୋତେ ।
ସତ୍ୟାଦି ବଚନ ମିଥ୍ୟା ହେଉଛି କେମନ୍ତେ ? ।୧।
ଚାରିଧର୍ମ ଗୁରୁବ୍ରହ୍ମ ମିଥ୍ୟା କି ସମସ୍ତେ ।
ଦଇବ କର୍ତ୍ତା ବଚନ ହେଉଛି ଅପ୍ରତେ ।୨।
ଶ୍ରୀଗୁରୁଦେବ ବଚନ ନ ଉଠେ ଯେମନ୍ତେ ।
ରେଣୁ ପରାଏ କଉଡ଼ି ଯାଉଛି ବିଅର୍ଥେ ।୩।
ପାଷାଣ ହୁଅଇ ପାଣି ଯାର ଆଜ୍ଞାମତେ ।
ଛାର କଷ୍ଟ ଜଣାଉଛି ଭାରା ଅନୁବ୍ରତେ ।୪।
ଅନ୍ତର୍ଯ୍ୟାମୀ ଦୟା କର ଚାହିଁ ଅନ୍ତର୍ଗତେ ।
ଅନ୍ତର ବାହାରେ ସୁସ୍ଥ ନାହିଁ କଦାଚିତେ ।୫।
କହେ ଭୀମ ଅରକ୍ଷିତ କରଯୋଡ଼ି ମାଥେ ।
ଗୁରୁ ଛାମୁରେ ଇଝାର ଜନପ୍ରାଣୀ ହିତେ ।୬।