ହିରାକୁଦ, ଚିପିଲିମା ଆଉ ସିନ୍ଦୋଳ ଯୋଜନାଗୁଡ଼ିକ ସମ୍ବଲପୁର ଜିଲ୍ଲାରେ ଅବସ୍ଥିତ ।
ତାପଜ ବିଦ୍ୟୁତ୍
ଅବିଭକ୍ତ ସମ୍ବଲପୁର ଜିଲ୍ଲାରେ ଝାରସୁଗୁଡ଼ାର ଇବ୍ ଉପତ୍ୟକା ଅଞ୍ଚଳରେ ସର୍ବାଧିକ କୋଇଲା ରହିଛି । ଅବଶ୍ୟ ଓଡ଼ିଶାର ଅବିଭକ୍ତ ଢେଙ୍କାନାଳ ଜିଲ୍ଲାର ତାଳଚେର ଅଞ୍ଚଳରେ ଓଡ଼ିଶାର ସବୁଠାରୁ ଅଧିକ ୨୬,୫୭୯ ନିୟୁତ ଟନ୍ କୋଇଲା ଅଛି । ଏହା ଫଳରେ ନାଲ୍କୋର ଆଲୁମିନିୟମ୍ର ଶେଷ ପ୍ରକ୍ରିୟାର କାରଖାନା ପ୍ରତିଷ୍ଠିତ ହୋଇଛି ।
ଓଡ଼ିଶାରେ ସମୁଦାୟ ଯେତେ ପରିମାଣର କୋଇଲା ଗଚ୍ଛିତ ଅଛି ସେଥିରେ ୨ୟ ସ୍ଥାନରେ ରହିଛି ଇବ୍ ଉପତ୍ୟକା(୨୧,୩୧୦ ନିୟୁତ ଟନ୍)ଯାହା ପରିସ୍ଥିତିର ଅନୁକୂଳତାଯୋଗୁଁ ଅଧିକ ଶିଳ୍ପୋଦ୍ୟୋଗୀମାନଙ୍କୁ ଆକର୍ଷିତ କରିଆଣିଛି । ଏହି ଗଚ୍ଛିତ କୋଇଲା ଓଡ଼ିଶାମୃଦ୍ଧିର ଏକ ମହାନ ବିଭବ । ଜଳବିଦ୍ୟୁତ୍ ଶକ୍ତି ଉତ୍ପାଦନର ଅନିଶ୍ଚିତତା, ଜଳ ଭଣ୍ଡାରର ଜଳଧାରଣର ପରିମାଣ ଉପରେ ନିର୍ଭର କରୁଥିବାରୁ ନୂତନ ଶିଳ୍ପପତିମାନେ ତାପଜ ବିଦ୍ୟୁତ୍ ଉପରେ ଅଗ୍ରାଧିକାର
ପ୍ରଦାନ କରୁଛନ୍ତି ।
ଜାତୀୟ କରଣ ଅନୁଷ୍ଠାନ- I.T.P.C ବନହରପାଲିରେ ନିଜସ୍ୱ ତାପଜ ବିଦ୍ୟୁତ୍ ଉତ୍ପାଦନ କେନ୍ଦ୍ରରେ ପ୍ରତିଦିନ ୪୨୦ ମେଗାଓ୍ୱାଟ୍ ବିଦ୍ୟୁତ୍ଶକ୍ତି ଉତ୍ପାଦିତ ହେଉଛି, ଯାହା ବିତରଣ
କରାଯାଉଛି ଓଡ଼ିଶା ସରକାରଙ୍କର ନିଜସ୍ୱ ପରିଚାଳିତ ଯୋଜନାରେ ।
ଏହାଛଡ଼ା ନିମ୍ନ ଉଦ୍ୟୋଗଗୁଡ଼ିକ ନିଜସ୍ୱ ତାପଜ କେନ୍ଦ୍ର ସୃଷ୍ଟିକରି ଝାରସୁଗୁଡ଼ା ଅଂଚଳରେ କୋଇଲା ନେଇ ନିମ୍ନଲିଖିତ ପରିମାଣ ପ୍ରତିଦିନ ବିଦ୍ୟୁତ୍ ଉତ୍ପାଦନ କରି ଚାଲିଛନ୍ତି ।
କ୍ରନଂ | ପ୍ରକଳ୍ପର ନାମ | ଦୈନିକ ବିଦ୍ୟୁତ ଉତ୍ପାଦନ (ମେଗାୱାଟ୍) |
---|---|---|
୧ | ରାଉରକେଲା ଇସ୍ପାତ କାରଖାନା | ୨୦୩ |
୨ | ହିଣ୍ତାଲ କୋ ହୀରାକୁଣ୍ତ | ୧୦୦ |
୩ | ଭୂଷଣ | ୧୦୦ |
୪ | ବେଦାନ୍ତ | ୫୦୦ |
ମୋଟ | ୯୦୩ |
ଏହି ତାପଜ କେନ୍ଦ୍ର ପ୍ରଚୁର ପରିମାଣର ପାଉଁଶ ଆଉ ସଲ୍ଫର ଡାଇଅକ୍ସାଇଡ଼୍ ଉତ୍ପନ୍ନ କରେ ଯାହା ପରିବେଶକୁ ବହୁ ପରିମାଣରେ ପ୍ରଦୂଷିତ କରେ । ଶିଳ୍ପର କେନ୍ଦ୍ରୀକରଣ ଝାରସୁଗୁଡ଼ାରେ ଏକ ଆଶିର୍ବାଦ ଥିଲାବେଳେ ଝାରସୁଗୁଡ଼ା ଅଂଚଳ ଅଧିକ ପ୍ରଦୂଷିତ ଅଂଚଳ ହେବ ବୋଲି ଭାରତୀୟ ପ୍ରଦୂଷଣ ବୋର୍ଡ଼ ଚେତାବନୀ ପ୍ରଦାନ କରଛନ୍ତି । ଏଣୁ ବିଭିନ୍ନ ପ୍ରତିକାର ବ୍ୟବସ୍ଥା ଗ୍ରହଣ ଅପରିହାର୍ଯ୍ୟ ହୋଇ ପଡ଼ିଛି ।