ଗୌରଚରଣ ଗୀତାବଳୀ/ରେ ଜୀବଧନ ! କାହିଁକି ତୁ ରଖିବୁ ଗୋଧନ

ଉଇକିପାଠାଗାର ରୁ
ସିଧାସଳଖ ଯିବେ ଦିଗବାରେଣିକୁ, ଖୋଜିବେ
ଗୌରଚରଣ ଗୀତାବଳୀ ଲେଖକ/କବି: ଗୌରଚରଣ ଅଧିକାରୀ
ରେ ଜୀବଧନ ! କାହିଁକି ତୁ ରଖିବୁ ଗୋଧନ

[ସତାଅଶି]

ସୁତବତ୍ସଳା ଯଶୋଦା

(ରାଗ ଲଳିତ କାମୋଦୀ ତାଳ ଆଠତାଳୀ)

ରେ ଜୀବଧନ ! କାହିଁକି ତୁ ରଖିବୁ ଗୋଧନ ରେ । ଘୋଷା ।
କେଉଁ ଦ୍ରବ୍ୟ ଅପୂର୍ବ କି ନମିଳି ମୋତେ ରେ
ବଛା ରଖିବାକୁ ବନେ ପଠାଇବି ତୋତେ ରେ । ୧ ।
ଲକ୍ଷେ ଲକ୍ଷେ ରଖୁଆଳ ଅଛନ୍ତି ମୋହର
ଭାତ ବରତନ ଖାଇ ହୋଇଣ ଚାକର ରେ । ୨ ।
ବନେ ବୁଲି ବଛା ଚରାଇବା ବଡ଼ ଦୁଃଖ
ଖରା ବରଷାରେ ଗଞ୍ଜି ଲବେ ନାହିଁ ସୁଖ ରେ । ୩ ।
କାନନେ ବାଘ ଭାଲୁଙ୍କ ଭୟଙ୍କର ବାଣୀ
ଛନ୍ନ ହେବୁ ବାବୁ ତାଙ୍କ ରବେ କର୍ଣ୍ଣେ ଶୁଣି ରେ । ୪ ।
ଭୟଙ୍କର ରୂପ ବାଡ଼େ ଚିତ୍ର ଲେଖା ଦେଖି
ଡରି ମୋ କୋଳରେ ବସି ବୁଜୁ ପରା ଆଖି ରେ । ୫ ।
ଖାଲ ଖଣା ଗୋଡ଼ି କଣ୍ଟା ଗହନ ବନସ୍ତେ
ସୁକୁମାର ପଦ ତୋର ଚାଲିବୁ କେମନ୍ତେ ରେ । ୬ ।
ହଂସୁଲୀ ତୂଳୀରେ ନିଦ ନ ମାଡ଼ରେ ତୋତେ
ଲୋଡ଼ିଲେ କି ଶଯ୍ୟା ଆଉ ମିଳିବ ବନସ୍ତେ ରେ । ୭ ।
ତୃଷା କଲେ ତହିଁ ଜଳ ନ ମିଳେ ରେ କହ୍ନା !
କ୍ଷୁଧା କଲେ ଫଳ ମୂଳ ଖାଇବୁ ତୁ ସିନା ରେ । ୮ ।
ଜାଣୁ ଜାଣୁ ଏତେ ଦୁଃଖ ପେଷିବି ବଙ୍କୁ
ସତ କି ମିଛ ମୋ ବାବୁ ! ବୁଝ ତୋ ମନକୁ ରେ । ୯ ।

ଫୁଟିଯାଏ ଆଖି ତୋତେ ନ ଦେଖିଲେ ଦଣ୍ଡେ
ତୁ ଆସିବା ଯାଏଁ ପ୍ରାଣ ଥିବ ଟି କି ପିଣ୍ଡେ ରେ ।୧୦।
ବଛା ରଖିବାରୁ ଧନ ବଡ଼ପଣ ଯେତେ
ଲୋଡ଼ାନାହିଁ ମୋର କ୍ଷଣେ ନ ଛାଡ଼ିବି ତୋତେ ରେ ।୧୧।
ଗୌର କହେ ଶ୍ରୀମୁଖକୁ ଚାହିଁଥିଲେ ତୋର
କୋଟି ଇନ୍ଦ୍ର ସମ୍ପତ୍ତି ମୁଁ ମଣୁଥାଇ ଛାର ରେ ।୧୨।