ଅର୍ଘ୍ୟଥାଳୀ/ପ୍ରଧାନପାଟ
ପ୍ରଧାନପାଟ
ଲେଖକ/କବି: ଗଙ୍ଗାଧର ମେହେର
ଆହା ସେ ପ୍ରଧାନପାଟ ନେତ୍ର-ପ୍ରୀତିକର,
ଭାବୁକର ଭାବମୟ ହୃଦୟରଞ୍ଜନ,
ଗିରିଶିରବିଭୂଷିତ ଶୁଭ୍ର-ସ୍ୱଚ୍ଛ-ଝର,
ଆତପତାପିତ-ତନୁ-ତାପ-ବିଭଞ୍ଜନ ।
ସମୁଚ୍ଚ ଶିଖରୁ ଲମ୍ଫ ଦେଇ ବାରମ୍ବାର
ସୁରମ୍ୟ ବିପିନ କୋଳେ ହୁଏ ପ୍ରପତିତ,
ସଦାଶିବ ଶିରୁ ଯେହ୍ନେ ଜାହ୍ନବୀର ଧାର
ଡେଉଁଅଛି ତାରିବାକୁ ଭୁବନେ ପତିତ ।
ବୀକୀର୍ଣ୍ଣ ହେଉଛି ଦେହୁ ଶୀକରନିକର,
ବୃଷ୍ଟି ହେଉଅଛି ଯେହ୍ନେ ମୌକ୍ତିକପଟଳ
ମଧୁର ନିନାଦକର ମ୍ଳାନିଗ୍ଳାନିହର,
ଦେଖିଦେଲେ ମନପ୍ରାଣ ହୁଏ ସୁଶୀତଳ ।
ଶୁଭ୍ର କରି କୁଣ୍ଡ ଫେନ ବୁଦ୍ବୁଦ୍ନିବହେ
ସୁବିମଳ ସ୍ରୋତ ହୋଇ ବନଗର୍ଭେ ବହେ ।
•••