ଅର୍ଘ୍ୟଥାଳୀ/ବାକ୍ୟବୀର ଓ କର୍ମବୀର
ବାକ୍ୟବୀର ଓ କର୍ମବୀର
ଲେଖକ/କବି: ଗଙ୍ଗାଧର ମେହେର
ଭେକ ଗରଜିଲେ ଆସଇ ବରଷା
ଜଳଧାରେ ମହୀ କରେ ପ୍ଳାବିତ,
ବାକ୍ୟବୀର ଡାକି କରଇ ଭରସା
କର୍ମବୀର ଥିବ ବୋଲି ଜୀବିତ ।
ମରୁଦେଶ ଭେକ ଗରଜଇ ନାହିଁ
ନାରଦ ସେ ଦେଶେ ନ ଦିଏ ନୀର,
କର୍ମବୀର କର୍ମ- କୁଣ୍ଠିତା ନ ଚାହିଁ
ନ ଡାକନ୍ତି କେବେ ବଚନବୀର ।
ହେଲେ ବିଦ୍ୟୁଲ୍ଲେଖା ଗର୍ଜନ ଭୀଷଣ
ଜଣାଯାଏ ମେଘ ବର୍ଷିବ ଜଳ,
ତେଜସ୍ୱିନୀ ଲେଖା ସୁତୀବ୍ର ଭାଷଣ
କର୍ମବୀରଠାରେ ନୁହେ ନିଷ୍ଫଳ ।
କୋକିଳ ଭାଷିଲେ ରସାଳ ପାଚଇ,
ଭୁଞ୍ଜନ୍ତି ତା ସୁଖେ ଜଗତ-ଜନ,
ବାକ୍ୟେ କର୍ମବୀର ଶକ୍ତି ସଞ୍ଚରଇ,
ତେବେ କରେ ଲୋକହିତ ସାଧନ ।
କାକ ଡାକ ଶୁଣି ଉଠଇ ମାନବ
କର୍ମେ ରତ ହୁଏ ତେଜି ପଲ୍ୟଙ୍କ,
ଚକ୍ଷୁ ଖୋଳି କାକ ଖାଇଲେହେଁ ଶବ
ପକାଇ ପାରଇ ନାହିଁ ପଲକ ।
ଉତ୍ତେଜିତ ଲୋକ ହୁଏ ଉପଦେଶେ
ଧନପଣ ତହିଁ ହୁଅନ୍ତି ଚାଳି,
ନ ଥାଏ ପୁରୁଷ- କାର ଯେଉଁ ଦେଶେ
ସହି ନେଇଥାଏ ସହସ୍ର ଗାଳି ।
•••