ଅର୍ଘ୍ୟଥାଳୀ/ବାଳ ପାଦପ
ବାଳ ପାଦପ
ଲେଖକ/କବି: ଗଙ୍ଗାଧର ମେହେର
କି କୋମଳ ମନୋହର ଚିକ୍କଣ ଉଜ୍ଜ୍ୱଳ,
ମହୀମାତୃକୋଳ-ଶୋଭୀ ବାଳ ତରୁମାନ,
ଅଖଣ୍ଡିତ କିଶଳୟ ବର୍ତ୍ତୃଳ ସରଳ
ଦିଶେ ଦରହାସାଞ୍ଚିତ ଅଧର ସମାନ ।
ନୟନେ ମଖାଇ ଦିଏ ପୀରତି-କଜ୍ଜ୍ୱଳ,
ପଦ୍ମରାଗ ମରକତ ବିଜୟ ବରଣ,
ସିକ୍ତ କରେ ମାନସକୁ ସିଞ୍ଚି ମୁଦ-ଜଳ,
ଲଭିଲେ ନବୀନ ରବି କନକକିରଣ ।
ହଲୁଥିଲେ ପବନରେ ଦିଶି ଝଲମଲ,
ଶୋକ-ସିନ୍ଧୁ ସୃଜି କୋଳେ ଲହରୀନର୍ତ୍ତନ,
ହିମବିନ୍ଦୁ ମଧୁମୟ ତା’ ବିମଳ ଦଳ,
ମଧୁମୟ କରିଦିଏ ସହୃଦୟ ମନ ।
ଧନ୍ୟ ତା’ର ଶିଳ୍ପକର ଶିଳ୍ପ କଉଶଳ,
ପୁନର୍ଦ୍ଧନ୍ୟ ଯେ ଗଢ଼ିଛି ନୟନଯୁଗଳ ।
•••