ଅର୍ଘ୍ୟଥାଳୀ/ବୁଢ଼ାରାଜା
ବୁଢ଼ାରାଜା
ଲେଖକ/କବି: ଗଙ୍ଗାଧର ମେହେର
ଦେଉଳ କୀରୀଟ-ଶିରେ ବିଜେ ବୁଢ଼ାରଜା,
ବିବିଧ କୁସୁମପୁଞ୍ଜେ ମଞ୍ଜି ଅପଘନ,
କୋହ୍ଳ ସୀମନ୍ତିନୀଙ୍କର ଚାହିଁ ନୃତ୍ୟମଜା
ତରୁ ଲୋମ ପୁଲକାଇ ମଜ୍ଜାଇଛ ମନ ।
ନିତି ନିତି ରେଳ ଆରୁ ଖଟୁଅଛି ପାଦେ
ବଜାଇ ବାଜଣା ଉଭା ହୋଇ ସିଂହଦ୍ୱାରେ,
ରଞ୍ଜୁଛି ମାନସ ତୁମ୍ଭ ରମ୍ୟ ଶଙ୍ଖନାଦେ,
ନାଦସ୍ରୋତ ପଡ଼େ ଯାଇ ହୃଦୟ-କେଦାରେ ।
ଦେଖିନେଲ ପ୍ରଥମରେ ଚୌହାଣଙ୍କ ଲୀଳା,
ସହିଲ ମର୍ହଟ୍ଟାଙ୍କର ଦୁର୍ନୀତିନିଚୟ,
ଦେଖିଲ ସୁନ୍ଦର ଯୋଗେ ଯେ କାଣ୍ଡ ଚଳିଲା,
ଦେଖୁଅଛ ଇଂରେଜଙ୍କ ରମ୍ୟ ଅଭିନୟ ।
ମାଡ଼ି ବସିଅଛ ମହୀ ମହା ସିଂହାସନ,
ତୁମ୍ଭ ଅଭିଷେକ କରେ ଜୀମୂତବାହନ ।
•••