ପାଦ ପାଣି ନାହିଁ ତାଙ୍କୁ ଧରିବ କିଏ

ଉଇକିପାଠାଗାର ରୁ
Jump to navigation Jump to search
ପାଦ ପାଣି ନାହିଁ ତାଙ୍କୁ ଧରିବ କିଏ
ଲେଖକ/କବି: ଭୀମ ଭୋଇ


ପାଦ ପାଣି ନାହିଁ ତାଙ୍କୁ ଧରିବ କିଏ ?
ଏମନ୍ତ ବ୍ରହ୍ମ ସ୍ୱରୂପ ଦେଖା ନ ଯାଏ । ଘୋଷା ।

ନାହିଁ ତାଙ୍କ ପେଟ ଅଣ୍ଟା ଫିଟାଇ କହୁଛି ଗୋଟା
ନରଦେହ ବହି ତାଙ୍କୁ କଳିବା ନୁହେଁ ।
ତାଙ୍କ ପରି ଶାନ୍ତି ପଣେ ତ୍ରିଭୁବନେ ନାହିଁ ଜଣେ
ନିନ୍ଦା ସ୍ତୁତି ହାନି ଲାଭ ସକଳ ସହେ ।୧।

ଭକ୍ଷଣ ନାହିଁ ଆହାର ରଜ ବୀର୍ଯ୍ୟରୁ ବାହାର
କ୍ଷୁଧା ତୃଷ୍ଣା କଲେ କ୍ଷୀର ନୀର ନ ପିଏ ।
ନ ଲାଗଇ ଅଙ୍ଗେ ଧୂଳି ବିରାଜି ଦିଶନ୍ତି ଝଳି
ନିଦ୍ରା ଘୁମାଇଲେ ଉଭା ଆସନେ ଶୁଏ ।୨।

ଇଚ୍ଛାରେ ଆସନ୍ତି ଭ୍ରମି ଭକତ ଭାବକୁ ପ୍ରେମୀ
ଶୁଣି ଚାହିଁବାକୁ କର୍ଣ୍ଣ ଚକ୍ଷୁ ନ ଥାଏ ।
ନାହିଣ ମୁଖ ଜିହ୍ୱା ନାସା ଉତ୍ତର ନ ଦିଏ ଭାଷା
ଆଗ ପଛ ଜାଣି ଧୀରେ ସମୀରେ ରହେ ।୩।

ଉଲଟ ପାଲଟ ନୋହି ମହା ଶୂନ୍ୟ ଶୂନ୍ୟ ଦେହୀ
ମୁଖବାଟେ ଜିହ୍ୱା କଣ୍ଠେ ବଖାଣି ନୋହେ ।
ସଦାଜୟ ପୂର୍ଣ୍ଣାନନ୍ଦ ପାଇଲେ ଚରଣେ ବନ୍ଦ
ନିରନ୍ତରେ ଆଜ୍ଞା ତିନିପୁରେ ଉଦୟେ ।୪।

ନାହିଁ ତାଙ୍କ ବର୍ଣ୍ଣ ଚିହ୍ନ ଅଶେଷ ରୂପରୁ ଭିନ୍ନ
ସକଳ କର୍ମ ବିଧାନ କରନ୍ତି ନ୍ୟାୟେ ।
ଆସିବା ଯିବା ହେଉଛି କରି ସର୍ବ କରାଉଛି
ନିଷ୍କାମ ଯୋଗରେ ନିଜ ନାମକୁ ଥୁଏ ।୫।

ସେ ବ୍ରହ୍ମର ତେଜ ଝାସେ ରହି ନ ପାରୁଛି ପାଶେ
ଅନୁଭବ ପଦ ମାତ୍ର କରିଛି ଲୟେ ।
ବୋଲେ ଭୀମସେନ ଭୋଇ ପୂର୍ବଦିଗେ ଛନ୍ତି ରହି
ଦୁଃଖ ସୁଖ ଜଣାଇବି ଭେଟିଲେ ପ୍ରାୟେ ।୬।