ସଙ୍ଗୀତ କଳ୍ପଲତା/ମାନ ଅବା ଲାଜ, ନ ଜାଣିଲି ଆଜ
| ←ରେ କିଶୋରୀ, ପଛେ ଛୁଇଁବୁ ମୋ ତନୁ | ସଙ୍ଗୀତ କଳ୍ପଲତା ଲେଖକ/କବି: ମାନ ଅବା ଲାଜ, ନ ଜାଣିଲି ଆଜ |
ମୋହିଲା ରେ, ବରମହିଳା ରେ→ |
(ରାଗ: ବଙ୍ଗଳାଶ୍ରୀ)
ମାନ ଅବା ଲାଜ, ନ ଜାଣିଲି ଆଜ, ମୁଖଚନ୍ଦ୍ର ନୁଆଇଲୁ।
ଆନ ପକାଇଲି ଅନେକ ମୋ ଗିର କାନପାଖକୁ ନ ନେଲୁ ରେ। ୧।
ଦୋଷ ଦେଖି ଯେବେ ନେତ୍ରେ ତେବେ ସିନା ରୋଷ ଅଙ୍ଗୀକାର କରି,
କି ସକାଶରୁଟି ମୋ ସକଳ ଭାଗ୍ୟ ମୋଷ ରଖିଲୁ ଚତୁରୀ ରେ। ୨।
ପିଆଇ ନ ଦେଲୁ ଅଧର, ଉରଜେ ଦିଆଇ ନ ଦେଲୁ ପାଣି,
ଫିଆଇ ବାସ ମଦନମୁଖୁଁ ମୋତେ ଜୀଆଇବୁ କେହି ପୁଣି ରେ। ୩।
ଛକାଇ ସନ୍ଧିକି ସନ୍ଧିରେ ନିବିଡ଼େ ଜଣାଇ ନ ଦେଲୁ ଦେହ,
ଧକାଇଲୁ ନାହିଁ କେଳିରୁ ପଛକୁ ପକାଇ ଦେଲୁ ମୋ ସ୍ନେହ ରେ। ୪।
ଗିରୀଷ-ପର-ଦଣ୍ଡ ରେ କେତକୀଗୋରି ସରିଲି ମୁଁ ସିନା,
ଶିରୀଷ ସରି ଶରୀର ଉଡ଼ାଇଲୁ ପୁରୁଷଘାତିନୀବାନା ରେ। ୫।
ମଦନମୋହନ ବଚନେ ଶ୍ରୀମତୀ ସଦୟ ହାସ ରଚିଲେ,
ସେ ସମୟ ଛବି ଭାବି ଭାବି କବିରବି ରାୟଗୁରୁ ବୋଲେ ରେ। ୬।