ଦୁଃଖନାଶନ ହେ ସୁଖ ନ ପାଇଲି ଦିନେ
| ←ମଣିମା ହେ ଏତିକି ମାଗୁଣି ମୋର | ଲେଖକ/କବି: ଦୁଃଖନାଶନ ହେ ସୁଖ ନ ପାଇଲି ଦିନେ |
କୃଷ୍ଣ କେଶବ ହରି→ |
ଦୁଃଖନାଶନ ହେ ସୁଖ ନ ପାଇଲି ଦିନେ
ରାଗ ଭୈରବୀ, ତାଳ ଖେମଟା
ଦୁଃଖନାଶନ ହେ ସୁଖ ନ ପାଇଲି ଦିନେ
ବେଳକୁ ବେଳ ତ ପ୍ରବଳ ହେଉଛି ବିଜୁଳି ଯେସନେ ଘନେ । ଘୋଷା ।
ଅନାଥର ନାଥ ନୀଳଗିରି ନାଥ ଜଗନ୍ନାଥ ଲକ୍ଷ୍ମୀସାଇଁ
ଅରକ୍ଷିତକୁ ତ ରଖି ଦେଉନାହଁ ଭବଜଳରେ ଭସାଇ । ୧ ।
ଆହେ ହରି ମୁହିଁ ସହି ନ ପାରଇ ଅନ୍ତର ବେଦନା ମାନ
ଯେଣୁ କରି ତୁମ୍ଭେ ଦୟା ନ କଲ ପ୍ରଭୁ ଆତଙ୍କନାଶନ । ୨ ।
ଏଡ଼େ ନିଷ୍ଠୁରତା ହେଲା ମୋହ ଭଳି ଦୁଃଖୀଜନ ହୀନଠାରେ
ହୀନଜନମାନେ ଗୁହାରି କରନ୍ତି ନ ଶୁଣ କି ତୁମ୍ଭେ ବାରେ । ୩ ।
ପୋଡ଼ୁ ମୋ ଅଦୃଷ୍ଟ ଅନ୍ନ ବସ୍ତ୍ର କଷ୍ଟ ଏଡ଼େ ବଡ଼ ପ୍ରଭୁ ଥାଉଁ
ବନମାଳୀ ବୋଲେ ଚଞ୍ଚଳ ମନ ମୋ ପଦ୍ମପାଦେ ତୁମ୍ଭ ରହୁ । ୪ ।