ଆମ ଓଡ଼ିଆ ବ୍ୟାକରଣ/ଅବ୍ୟୟ ପଦ

ଉଇକିପାଠାଗାର‌ରୁ
Jump to navigation Jump to search
ଆମ ଓଡ଼ିଆ ବ୍ୟାକରଣ (୨୦୧୪)  ଲେଖକ/କବି: ଧନେଶ୍ୱର ମହାପାତ୍ର
ଅବ୍ୟୟ ପଦ
ଅବ୍ୟୟ ପଦ

(କ) କମଳା ଓ ବିମଳା ଦୁଇ ଭଉଣୀ ।
(ଖ) ଶିକ୍ଷକ ଆଜି ଗଦ୍ୟ କିମ୍ବା ପଦ୍ୟ ପଢ଼ାଇବେ ।

ପ୍ରଥମ ବାକ୍ୟରେ ‘ଓ’ ପଦଟିର ରୂପରେ କୌଣସି ପରିବର୍ତ୍ତନ ହୋଇପାରିବ ନାହିଁ । ସେହିପରି ଦ୍ୱିତୀୟ ବାକ୍ୟରେ ‘କିମ୍ବା’ ପଦଟିର ରୂପରେ କୌଣସିି ପରିବର୍ତ୍ତନ ହୋଇପାରିବ ନାହିଁ ।

ଯେଉଁ ପଦର ରୂପରେ କୌଣସି ପରିବର୍ତ୍ତନ ହୁଏନାହିଁ, ତାହାକୁ ଅବ୍ୟୟ ପଦ କହନ୍ତି ।

‘ଓ’ ‘କିମ୍ବା’ ଦୁଇଟି ଅବ୍ୟୟ ପଦ ।

ବିଶେଷ୍ୟ ପଦ, କ୍ରିୟାପଦ, ବିଶେଷଣ ପଦ ଏବଂ ସର୍ବନାମ ପଦ-
ଏସବୁର ରୂପରେ ପରିବର୍ତ୍ତନ ହୁଏ । ଉଦାହରଣ ସ୍ୱରୂପ-

ବିଶେଷ୍ୟ ପଦର ପରିବର୍ତ୍ତନ-
ଲୋକ, ଲୋକମାନେ, ଲୋକକୁ, ଲୋକମାନଙ୍କୁ, ଲୋକଦ୍ୱାରା, ଲୋକମାନଙ୍କଦ୍ୱାରା, ଲୋକପାଇଁ, ଲୋକମାନଙ୍କପାଇଁ ଇତ୍ୟାଦି ।

କ୍ରିୟାପଦର ପରିବର୍ତ୍ତନ-
ଖାଏ, ଖାଉଛି, ଖାଇଲା, ଖାଇବ, ଖାଆନ୍ତି, ଖାଉଛନ୍ତି, ଖାଇଲେ, ଖାଇବେ, ଖାଉଥିବ, ଖାଇଥିବେ ଇତ୍ୟାିଦି ।

ବିଶେଷଣ ପଦର ପରିବର୍ତ୍ତନ-
ସରଳ-ସରଳା, ହଂସ-ହଂସୀ, ଡାକ୍ତର-ଡାକ୍ତରାଣୀ ଇତ୍ୟାଦି । ସର୍ବନାମ ପଦର ପରିବର୍ତ୍ତନ-

ସେ, ସେମାନେ, ତାକୁ, ସେମାନଙ୍କୁ, ତା ଠାରୁ, ସେମାନଙ୍କଠାରୁ, ତାର, ସେମାନଙ୍କର ଇତ୍ୟାଦି ।

କିନ୍ତୁ ଅବ୍ୟୟ ପଦର କୌଣସି ପରିବର୍ତ୍ତନ ହୁଏନାହିଁ । ତାହାର ରୂପ ସର୍ବଦା ସମାନ ।

ଅବ୍ୟୟ ପଦ ଅନେକ । ଏଠାରେ କେତୋଟି ମାତ୍ର ଦିଆଗଲା-

କିନ୍ତୁ, ପୁଣି, ତଥାପି, ଯଦି, ତେଣୁ, ବା, ଅବା, ହଠାତ୍‍, କାହିଁକି, ବାରମ୍ବାର, ଆଚ୍ଛା, ସିନା, ପରା, ସର୍ବଦା, ତେବେ, ଆହା ଇତ୍ୟାଦି ।

ତୁମେ ନିମ୍ନଲିଖିତ ବାକ୍ୟମାନଙ୍କରେ ଅବ୍ୟୟପଦଗୁଡ଼ିକୁ ଚିହ୍ନାଇଦିଅ-

(କ) ଆପଣ କହୁଛନ୍ତି ସିନା, କିନ୍ତୁ ସେ ଆସିବ ନାହିଁ ।
(ଖ) ହରିବାବୁ ହଠାତ୍‍ ରାଗିଗଲେ ।
(ଗ) ଆଚ୍ଛା, କହ, ଦୁର୍ଯ୍ୟୋଧନ କାହିଁକି ହସିଲେ ?
(ଘ) ଯଦି ସେଠାକୁ ଯିବାକୁ ଚାହୁଁଛ, ତେବେ ଯାଅ ।
(ଙ) ଗୋପବନ୍ଧୁ ଅସୁସ୍ଥ ହୋଇପଡ଼ିଥିଲେ, ତଥାପି ସେ ବାରମ୍ବାର ଲୋକଙ୍କୁ ସାହାଯ୍ୟ କରିବାକୁ ଗଲେ ।

Aama Odia Byakarana.pdf

ସତ କହିବାକୁ କିଆଁ ଡରିବି ।
ସତ କହିପଛେ ମଲେ ମରିବି ।

ସୁଖେ ଦୁଃଖେ ଅବା ସଂପଦେ ବିପଦେ ।
ରହୁ ମୋର ମନ ସଦା ତୁମ ପଦେ ।

Aama Odia Byakarana.pdf