କିଶୋରଚନ୍ଦ୍ରାନନ୍ଦ ଚମ୍ପୂ/ଢ ଚମ୍ପୂ
ଢ ଚମ୍ପୂ
(ରାଗ ଗୌଡ଼ା, ତ୍ରିପଟା)
ଢାଳେ ତ ଢାଳିଲୁ ନାହିଁ କୃପାସୁଧା ଝରିକିରେ ।ପଦ।
ଢକ୍କା ବାଜୁଥାଇ ବ୍ରଜେ, ଲଳିତାର ହୃଦମ୍ବୁଜେ,
କରୁଣା ଅଛି ବୋଲି ଯା ନେଲା କେ ତା ହରି କିରେ ।୧।
ଢୁଳାଇଲା ପରି ଢଳି, ତଳେ ପଡ଼ିଯିବା ଭଳି,
ହେଲିନି ଯେ କୁନ୍ଦକଳିଦଶନା ଏ ସରିକିରେ ।୨।
ଢୁକାଇ ଦେଲେ ତୃଷିତ, ଚକୋର ଚଞ୍ଚୁରେ ଶୀତ-
ଭାନୁଚନ୍ଦ୍ରିକାକୁ ବିତ୍ତ ଯାଏ କିଛି ସରିକିରେ ।୩।
ଢୋକିଟିକୁ ସିନା ହଟି, ମୋ ସାର ଯାଉଛି ତୁଟି,
ପିଇ ଦିଅନ୍ତି କି ଗୋଟିଯାକ ସେ କିଶୋରିକିରେ ।୪।
ଢବା-ତନାବିରୁ ଗୋପ—ନଗରୀର ବନ୍ଦେ ଭୂପ,
ବାଲୁଙ୍କେଶ ଦେବ ନୀପକୁଞ୍ଜପୁଞ୍ଜସରିକିରେ ।୫।